نائن الیون دنیا اور اردو افسانے کے تخلیقی رجحانات | ڈاکٹر سائرہ ارشاد

ڈاکٹر سائرہ ارشاد اور ڈاکٹر لیاقت علی بہاول پور کی علمی روایت کے دو اہم نام ہیں۔ یہ وہ ایم فل کا مقالہ ہے جو سائرہ ارشاد نے ڈاکٹر لیاقت علی کی نگرانی میں لکھا ہے۔ گیارہ ستمبر کو امریکہ کے قلب پر ایک وار ہوا جس پر بہت سی باتیں ہوئیں کہ یہ حقیقی حملہ تھا یا سپانسرڈ بہر طور اس کے نتیجے میں عالم اسلام خاص طور پر پاکستان معتوب ہوا۔ ڈاکٹر سائرہ ارشاد نے بجا طور پر پاکستان کے حصے میں آنے والے عصری آشوب کی منظر بندی کے لئے افسانے کو آئینہ بنایا۔ انہوں نے اس میں نمائندہ افسانوں کے تجزیے کے ذریعے اپنے موضوع کی توضیح کی۔ مجھے یقین ہے کہ علمی حلقے اس مقالے کو پذیرائی بخشیں گے۔

ڈاکٹر انوار احمد

 (سابق سربراہ شعبۂ اردو، بہاء الدین زکریا یونیورسٹی، ملتان ) 

ڈاکٹر سائرہ ارشاد ابھرتی ہوئی قلم کار ہیں۔ انھوں نے کم وقت میں علمی وادبی سطح پر خود کو منوایا ہے۔ ان کی اس کتاب میں دہشت گردی اور نائن الیون کے تناظر میں لکھے گئے اردو افسانے میں اکیسویں صدی کے انتشار، عدم تحفظ ، شناخت ، عدم برداشت عدم اعتماد، خوف اور نفرت سمیت بے شمار نفسیاتی مسائل کو زیر بحث لایا گیا ہے۔ اردو افسانے کے مزاج ، موضوعات، اسالیب اور تکنیک کو احسن طور پر پیش کرنے کی کوشش کی گئی ہے۔ نائن الیون کا پس منظر، امریکہ کے سماجی مسائل اور مسلم دنیا کی مشکلات کے علاوہ مشرقی اقدار وروایات کے حامل افراد کی زندگیوں کو مرکز بنا کر ان افسانوں میں بتایا گیا ہے کہ لوگ کسی طرح المیے سے دوچار ہو کر نہ صرف اپنی تہذیبی و مذہبی شناخت کھو دیتے ہیں بلکہ نفسیاتی مسائل کا بھی شکار ہو جاتے ہیں۔

اس کتاب میں افسانہ نگاری کو مد نظر رکھتے ہوئے اکیسویں صدی کا بدلتا ہوا بیانیہ مدلل، توضیحی اور منطقی انداز سے پیش کیا گیا ہے۔ نائن الیون انسانی تاریخ میں ایک نئے دور کی شروعات کا وہ المناک واقعہ ہے جسے تاریخ، سیاست اور ادب میں مختلف مکتبہ فکر کے اسکالرز نے مختلف زاویوں سے دیکھنے کی کوشش کی ہے۔ پاکستانی اردو افسانے میں بھی نائن الیون کو اس نئے اور مختلف بیانیہ کے پس منظر میں پیش کیا گیا ہے۔ اس کتاب کی اشاعت پر میں ڈاکٹر سائرہ ارشاد کو مبارک باد پیش کرتا ہوں۔

پروفیسر ڈاکٹر یوسف خشک

( سابق چیئر مین اکادمی ادبیات، اسلام آباد)